田北辰質疑棚網標準！這才是人話！
- DonnaLeung
- 4小时前
- 讀畢需時 2 分鐘
今日政府話，宏福苑棚網經化驗達阻燃要求。我相信有睇過片段嘅都會覺得好詫異，達到標準都燒得咁猛咁快？咁究竟係唔係個標準有問題呢？呢個標準係唔係達到國家同國際要求，如果係，即係呢個標準都唔夠高，係唔係要用個更高標準呢？另外，我覺得要同公眾解釋點化驗，如果係化驗燒剩嘅網，會唔會燒完再驗所以結果有偏差呢？現場有一座冇受波及，可唔可以即場剪落嚟燒吓，俾大家知呢個標準遇火會點呢？
延續返我昨日嘅錄影片段就話，所有臨時性工程，屋宇署唔會去審批，只會set個標準，叫嗰啲人後果自負。我認為，將來呢啲臨時性，又有災難性可能，署方應該親自去審批， 而且審批唔應該交張紙算數，係真係去抽查，去實地抽查真嘅樣本。今次勞工處話，查過哂證書，但大家睇到燒得咁快，一係就嗰啲證書造假， 一係就交貨係假，所以屋宇署， 定要落水去查。雖然我噚日話同意政府推動使用金屬棚架，但其實我一直認同今次火災係另有原因，不停呼籲政府要嚴正看待違規安全網嘅問題，而噚日政府嘅行動亦宣佈會實地測試，「屋宇署及房屋局獨立審查組今日已啟動特別行動，分批巡查全部項目，主動檢查棚架保護網等物料的阻燃性能的紀錄或相關測試文件，並會抽取樣本進行測試」，我同意係而家當務之急。
但呢個巡查只係即時要做嘅第一步，之後起碼有兩樣嘢要做，第一係修例。根據勞工處《竹棚架安全工作守則》，棚網必須具備阻燃性才可採用。而根據部門說法，守則本身雖然並非法例，但具有特殊的法律地位。咁而家事實證明守則唔夠，就應該名正言順正式修例，立法規管安全網物料，違例就嚴懲。第二，立完法就要嚴例執法，事實亦證明睇文件睇證書呢一步係完全冇用，所有安全網使用前後都應該要實地抽查，而且唔只一次，因為合格嘅安全網用咗一段時間之後效能會衰退，法例同抽查係要確保所有物料都一直有效。
關於使用發泡膠，即使未詳細調查，常識都話俾我哋知係唔妥。而家可能有個問題，法例規管咗某啲嘢，而冇寫嘅就變咗冇規管，巡查又冇理。咁將來嘅寫法就可能要大包圍，只要工地會用到嘅物料都要符合防火同安全標準。
留言