前財政司司長曾俊華對大埔宏福苑大火的公開言論！

近日相信唔少朋友都同我一樣，心情相當沉重。近年香港雖然一次又一次面對前所未有嘅重大挑戰，但係當我哋見到咁多市民喺大埔宏福苑呢場特大火災裡面，失去性命，痛失家園，有消防員為拯救生命而殉職、受傷、筋疲力竭，嗰種震撼同悲慟，絶非筆墨所能形容。

令人稍感安慰嘅，係喺呢啲困難時刻，見到香港人一呼百應，守望相助嘅美麗，大家都喺自己嘅崗位，盡力為災民提供各式各樣嘅協助。

我喺八十年代初回流返香港，加入政府之後被派去嘅第一個工作崗位，就係出任沙田助理政務專員。大埔毗鄰沙田，所以嗰時我經常都會去大埔，同當地嘅地區同事見面，傾一啲共同面對嘅地區問題。當時大埔同沙田，都發展咗冇幾耐，尤其係大埔，喺七十年代尾，先至被列為新市鎮開始發展，所以當時區內人口同樓宇，都比依家少得多。

當時大埔嘅居民，特別係啲村民都好純樸、好簡單，好率直。記得有一次，我同啲同事喺大埔行山，周山走，四圍兜，想多啲了解下地方嘅需要。我哋經過其中一條村嘅時候，撞到一位村民，我哋就同佢打招呼，點知佢顯得好開心，仲非常好客咁問我哋：「你哋食咗嘢未呀？」跟住佢就拎咗屋企飼養母雞所生嘅雞蛋出嚟，即刻烚熟比我哋食。喺我腦海裡面，呢隻家雞雞蛋，係我食過最好味嘅雞蛋，到依家每次回味，仍然覺得好感動。

不過，我哋一定要從呢次悲劇中，汲取教訓，避免同樣嘅事件再次發生，但係我就覺得，唔應該咁快作下結論，去判「竹棚」死刑。有普通常識嘅人都會知道，竹唔係咁容易燒著，問題可能係箍住竹枝嘅膠繩，而金屬棚架亦唔係固若金湯，遇上極高溫嘅時候，同樣有機會倒塌。我哋從現場片段睇到，唔少大廈外牆搭建嘅棚架，經過幾十小時嘅大火焚燒之後，仍然未有塌下，被燒毀嘅，主要都係嗰啲棚網同封窗發泡膠板，所以造成今次慘劇嘅「罪魁」，顯然唔係竹棚呢種建築材料，反而係咪應該從人為角度出發去調查呢？例如，火災係咪因為有人吸煙引起呢？ 係咪有人採用咗一啲唔合格嘅物料呢？制度上仲有冇要補足嘅地方呢？可以考慮經過專業調查研究之後，先至再提出長遠改善同監管嘅方法。

搭棚喺香港以至廣東地區，已經有四五百年嘅歷史，戲棚搭建技藝甚至已經被列入香港非物質文化遺產，其實唔少外國人嚟到香港，見到我哋可以將啲竹咁樣吊上去啲高樓大廈，作為修建大廈嘅工具，都會覺得好神奇，如果因為今次事件就貿然決定禁用靈活有彈性嘅竹棚，我覺得會係非常可惜。

我相信好多人都未必清楚，喺我哋嘅元朗區，每 10 年就會有一個例醮勝會嘅風俗，每次都要搭一個好大嘅竹棚。我了解本屆嘅醮棚，將會係以大金鐘造型，喺十月八日已經開始興工，預算會喺十二月五日完工，呢個大棚有一個 190 呎乘 130 呎，即係 24700 平方呎，可以坐二千人嘅戲棚，中間橫跨度有 68 呎，一條柱都唔使，戲台都有 100 呎乘 50 呎，有成 5000 平方呎，全個棚用咗 3400 枝杉木同 23000 枝竹。真係奇觀嚟㗎，大家有機會都可以去參觀吓。

從實際角度去睇，全港超過六成嘅私樓，樓齡達到 30 年及以上，依家啲舊樓一做大維修，啲業主就呻要支付天價維修費，如果全面以金屬棚架，代替造價平一截嘅竹棚，普羅市民係咪承擔得到呢？希望香港嘅專業團體同各界人士，能夠畀多啲意見俾我哋大家去參考。

＃願逝者安息